DAVAO CITY – Hugtanon nga gipahimangnoan karon ang mga beach resorts sa Island Garden City of Samal nga kinahanglan nga motamud sa gipagulang kamandoan gumikan kay hugtanon sab ang ilang himuon nga monitoring niini isip pagtamud pa gihapon sa health protocols bisan nga gitugot na ang pag-abli sa pipila ka mga resorts sa isla.

Kahinumduman nga kalakip sa gipagulang kamandoan ni Mayor Al David Uy nga kinahanglan hangtud 75 percent lamang sa ilang operational capacity ang tugutan sa mga establisyemento ug resorts sa isla.

-- Advertisement

Kinahanglan sab nga anaa sa pito ka adlaw ang aplikasyon sa Mayor’s Permit ayha ang adlaw sa okasyon o aktibidad nga himuon sa Samal.

Hugtanon sab karon ang pagsubay sa QR codes ayha tugtan nga makasulod sa siyudad o sa bisan asa man nga resorts sa isla.

Kinahanglan sab karon ang pre-booking ug no “walk in” guest ang tugutan partikular kadtong dili mga residente sa lugar. 

Hugtnaon na sab karon nga i-check ang QR Code ug  valid ID ayha tugutan kadtong mga adunay plano nga mosulod sa isla.

Bisan nga gitugot na karon ang mga minor nga motabok sa samal,angayan nga kauban niini ang iyang mga ginikanan samtang dili na sab kinahanglan nga magdala pa ug medical certificates ang mga senior citizen.

Kahinumduman nga dungan sab sa pagpalu-ag sa mga nagkadaiyang aktibidad sa Samal, magpabilin matud pa ang pagpatuman sa mga hugtanon nga mga sumbanan ug polisiya sa isla aron nga hinay-hinay nga makabangon ang ilang ekonomiya human ang pipila ka bulan nga na-undang ang operasyon sa mga resorts sa isla gumikan sa pandemiya.