CEBU – Nahimong emosyunal si Darius Nioda ang Overseas Filipino Worker (OFW) nga stranded sa Dubai gumikan kay maka uli na kini sa Pilipinas human tabange sa Bombo Radyo Cebu nga matulay sa buhatan sa Department of Labor and Employment (DOLE).

Dako ang pasalamat ni Nioda sa Bombo Radyo Cebu nga nahimong instrumento aron mapaabot ang kahimtang niini sa Dubai ngadto sa hingtungdang ahensiya.

Pagsaysay pa niini sa eksklusibong pakighinabi sa BomboHanay Bigtime, gikontak dayon kini sa mga representante sa DOLE ug sa Immigration Department niadtong adlaw nga nagpatabang kini sa sibyaanan.

-- Advertising --
Darius Nioda, OFW sa Dubai

Ning kasamtangan, aduna na’y ticket si Nioda pauli sa Pilipinas ug gi-swab test na kini karon isip usa sa kabahin sa protocol sa pagbiyahe ning panahon sa pandemya.

Kahinumduman nga gitabangan sa Bombo Radyo Cebu si Nioda human kini na-stranded gumikan sa alegasyon kapila na gibalibaran sa airlines gumikan sa matud pa travel ban sa Pilipinas.

Gi paabot sa sibyaanan ang concern niini ngadto sa buhatan sa DOLE diin Hulyo singko ning kasamtangang tuig, nakontak sa sibyaanan si DOLE Sec Silvestre Bello III ug gipasalig niini nga tabangan si Nioda sa mao niini nga sitwasyon ug aron nga makauli sa nasod sa labing daling panahon.

Giklaro ni Bello nga ‘exempted’ ang mga Overseas Filipino Workers (OFW) sa mga gipatuman nga travel ban. Sa eksklusibo nga pakighinabi sa Bombo Radyo Cebu kang Bello, gitino niini nga ang gi-ban lang sa pagsulod sa Pilipinas mao ang mga residente sa usa ka nasud nga nalakip sa travel ban.

Subay sa maong kalambuan nagpasalamat ang asawa ni Darius Nioda nga si Riza Nioda sa kalambuan nga nahitabo sa sitwasyon sa iyang bana nga stranded sa Dubai.

Dako matud pa nga tabang nga makapauli na sa Pilipinas ang ilang padre de pamilya diin magsilbi matud pa kini nga bililhong regalo sa mag-birthday nila nga anak.

Nagpasalamat si Mrs. Nioda sa Labaw’ng Makagaghum ingon man sa sibyaanan sa Bombo Radyo nga niaksiyon dayon sa mao nilang problema aron mapaabot sa buhatan sa DOLE ang sitwasyon.

Gisaysay ni Mrs Nioda nga aduna na’y gihambin nga kondisyon sa panlawas ang iyang bana ug anaa na kini gimentenar nga mga tambal. Niresign matud pa kini ug tarong sa trabaho sulod sa 18 ka tuig sa gisilbihan niini nga kompanya sa Dubai.

Tuig 2019 pa sila nakadesider nga mouli sa Pilipinas apan gumikan sa COVID-19 nalangan ang ilang pagbiyahe. Karon nga nakapondar na ang ilang pamilya, mas gipili nila ning kasamtangan nga dinhi na sa Pilipinas manginabuhi uban ang tibuok pamilya.