CEBU CITY — Mi-anunsyo si Cebu City Vice Mayor Michael Rama nga ipahigayon ang ritual showdown sa Sinulog 2021 sa South Road Properties (SRP) sa dakbayan sa Sugbo karong Enero 17.

Kini na ang unang higayon sa kasaysayan sa Sinulog diin ipahigayon ang pagsayaw sa mga contingents sa gawas sa naandan nga Cebu City Sports Complex.

Matud ni Rama, kinsay nag-una sa pagpangandam niini, nga himoong “virtual” ang pagpahigayon sa grand showdown kung diin walay bisan unsang audience ang makasulod sa venue.

-- Advertising --

Sa pagkakaron, nagpadayon ang mga panagsabot tali sa kagamhanan sa dakbayan, sa Sinulog Foundation Inc., ug sa mga stakeholders ug negosyante alang sa malampusong pagpahigayon sa maong fiesta.

Pasabot niini, lauman sa katawhan ang usa ka “unconventional” ug “innovative” nga pagselebrar sa pista sa Balaang Bata ning panahon sa new normal.

Mipasalig usab si Rama nga dili gayud ibutang sa peligro ang linahi nga pagpahigayon sa Sinulog Festival kung diin motamod ang mga organizers ug mga partisipante sa gitaganang mga lagda sa kwarantina.