CEBU CITY – Nagkahi-usa ang mga Sugbuanon nga mahiligon ug basketball ingon man nga gi-idolo usab ang mitaliwan nga NBA legend Kobe Bryant pinaagi sa usa ka commemorative run nga “Run For Kobe”.

Gibutyag ni Arvin Loberanis, athletics coach ug usa sa mga organizer, nga namugna ang maong kalihokan alang sa katuyoan sa pagpakita sa ilahang pagmahal sa Black Mamba, ingon man ang pagduyog sa kasub-anan sa asawa ug duha ka mga anak nga na-ilo ni Kobe.

Magsugod ang kalihokan alas 4 sa kaadlawon ug gibana-bana kining mahuman ug alas 7 sa buntag.

-- Advertising --

Ipahigayon ang “Run For Kobe”, sa adlaw nga Dominggo, Pebrero 2, diin sugdan ang pagdagan sa Cebu City Sports Center paingon sa Talamban, Cebu.

Giklaro ni Loberanis nga walay bayad ang maong kalihokan ug gikinahanglan lang nga magsul-ob ug kaugalingong jersey nga adunay number 8 o number 24, kansang numero usab ni Bryant.

Ang gusto nga musalmot sa kalihokan kinahanglan nga mu adto sa venue ug didto na magparehistro.

Gipahibalo ni Loberanis nga mahimo rang mamili ug kategorya ang mga musalmot diin makadagan kini sila ug 8K or 24K run.