CEBU CITY-Mitambag ang asawa sa usa ka professional boxer sa mga Pilipino nga tan-awon ang positibo’ng butang gumikan sa COVID-19 crisis inay nga puro nalang reklamo.

Kini human nga nagviral ang usa ka inspirational facebook post ni Cheryl LaspiƱas Rosales kalabot sa iyang asawa nga si Jessie Rosales,usa ka boxer nga nakabasi sa Amerika apan nahimo nalang karo’ng kargador gumikan sa COVID-19 pandemic.

Sa pakighinabi sa Bombo Radyo Cebu kang Cheryl, sa tulumanong Kagahapon Pa Lang gibutyag niining nahuna-hunaan niya nga magpost sa kasinatian sa social media gumikan kay puno na og negativity ang mga tao ug puros reklamo nalang.

-- Advertising --

Pagsaysay niini nga gumikan kay naapektaran ang boxing industry sa pandemic, nangita og alternatibo ang iyang bana aron makabuhi sa ilang pamilya ug ang nakita niini nga paagi mao ang pagkargador.

Apan gihimug-atan usab ni Cheryl nga duna usab maayo nga nahimo ang covid pandemic kanila gumikan kay mas nagkabonding na hinoon sila’ng pamilya nga nagpuyo na karon sa Brgy. Mabolo, Cebu City. Nakatabang usab matud pa kang Jessie ang pag-ka-kargador gumikan kay daw sama nga nagtraining kini ug mamintinar ang ka “fit” sa panglawas pinaagi sa pagpang-alsa sa mga sinakong semento.

Matud ni Cheryl nga mukabat sa 2,000 ka sakong semento ang pas-anon sa iyang bana sa tibuok adlaw niini sa pier 4 ni’ng dakbayan ug magbike pa kini padulong sa trabaho-an.

Bisan kausa, wala matud pa niya madunggan nga mureklamo ang iyang bana ug gani, kini pa ang nagtudlo kaniya nga lantawon ang mga maayong butang taliwa sa mga hagit sa kinabuhi.

Hinungdan nga mitambag kini sa mga Pilipino taliwa niining krisis ilabina ang duna pa’y mga trabaho apan sige og reklamo, nga huna-huna-on ang iyang bana nga gihimo ang tanan ug nangita og paagi aron mabuhi ang pamilya, inay nga mureklamo, mas maayong mutabang nalang.

Hulagway gikan sa FB account ni Cheryl Rosales
Hulagway gikan sa FB account ni Cheryl Rosales