CEBU CITY – Giawhag ni BARUG Alang sa Kauswagan ug Demokrasya (Bakud) gubernatorial bet Ace Durano ang Capitolyo sa paggamit sa dako nga media budget aron palapdan ang information drive kabahin sa benipisyo sa bakuna aron masulbad ang mga pagduha-duha ug mapaayo ang paggamit sa bakuna sa probinsya.

Matod pa ni Durano, nga daghan kinig nabasahan sa social media nga daghan pa ang mga indibidwal nga nagduha-duha sa pagpamakuna diin moresulta kini sa pagka-usik sa bakuna.

Tataw pa niini, nga aron masulbad ang maong problema kinahanglan nga gamiton sa Kapitolyo ang dako niini nga badyet sa media aron mahatag sa mga tawo ang kasayuran nga ilang gikinahanglan.

Niadtong Oktubre 10, 2021, mibutyag ang Visayas Vaccination Operations Center (VVOC) nga ang dakbayan sa Sugbo adunay 704, 885 doses sa Covid 19 vaccine nga wala magamit ug nagdasig sa mga LGU nga paspasan ang pagpadagan sa pagpamakuna.

Dugang pa sa opisyal, nga lisud kaayo kung masayang ang mga bakuna diin matod pa niini mas madugay ang Sugbo sa pagpabuhi pagbalik sa ekonomiya.

-- ADVERTISEMENT --

Subling gihimug-atan ni Durano nga kinahanglan sa katawhan ang sakto nga impormasyon gikan sa hingtungdang ahensya.

Ang Capitolyo adunay kaugalingong programa sa balita (news program), Sugbo News, nga aduna usay lig-on nga presensya online ug nituo si Durano nga mahimo kini nga magamit alang sa impormasyon bahin sa bakuna./ BJR