CEBU CITY — Giuyunan sa Children’s Legal Bureau, Inc. (CLB) ang lakang sa pipila ka mga Senador nga mao ang pagpahigayon og imbestigasyon kabahin sa nagkagrabeng transaksyon sa child pornography.

Una nang gi-report sa Anti-Money Laundering Council (AMLC) nga mikabat ngadto sa P113-million ang balor sa child porn transactions sa nakalabay nga unom ka buwan.

Butang nga gikabalak-an sa pipila ka mga magbabalaud sama nilang Sen. Imee Marcos, Sen. Sherwin Gatchalian, ug Sen. Christopher Bong Go.

-- Advertising --

Sumala pa sa Communications Officer sa CLB nga si Atty. King Anthony Perez, nga dili kini usa ka isolated case sanglit usa ang Sugbo sa sentro sa maong transaksyon.

Sa interview sa Bombo Radyo ngadto ni Perez, gihimug-atan niini nga kinahanglan ang striktong monitoring ug compliance batok sa pornograpiya diin nakalatid kini sa Anti-Child Pornography Act o RA 9775.

Sugyot usab sa maong manlalaban nga kinahanglang consistent ang pagbantay sa gobyerno batok sa mga perpetrators naglugway sa mga bata sa kadaut dala sa pornograpiya.

Nakita ug giuyunan sa CLB nga ang kawad-on ug coronavirus crisis maoy nag-unang hinungdan nganong nagtukmod ang mga menor de edad sa pagbaligya sa hubo nga hulagway ngadto sa internet.

Samtang nag-exist gihapon ang mga insidente kung diin ang ginikanan mismo maoy nagbugaw sa ilang anak ngadto sa makalaw-ay nga binuhatan aron makakwarta.

Nagpasalamat usab ang CLB sa mga tinugyanan sa balaud kinsang nagbantay ug nakigbatok sa mga perpetrators.

Abli usab ang buhatan sa CLB alang sa mga naapektuhan sa child abuse cases pinaagi na sa ilang online legal assistance. (Bombo Gian Navarro)