CEBU CITY-“Practice” pa lang matud pa ang nahitabong pagpangawat sa mga jewelry stores ug money changer outlet sulod sa JCenter Mall, Mandaue City, Cebu niadtong gabii sa Sabado.

Kini ang nahimong pamahayag sa usa sa mga nasikop nga suspect nga si Arnel Cimafranca nga ekslusibo nga nahinabi sa Bombo Radyo Cebu.

Arnel Cimafranca, interviewed by Bombo Eric Amaro

Si Cimafranca lumad nga Tangub City sa Mindanao ug giingong gi-recruit lang siya sa iyang mga barkada. ‘Truck man’ matud pa ang gitanyag nga trabaho kaniya sa Cebu apan sa dihang miabot na kini sa siyudad, ayha palang nasuta niini nga pagpanulis diay ang ilang himoon.

-- Advertising --

Gitagaan matud pa sila og iya-iya nga assignment sa himoong pagpangawat nga usa ka buwan matud pa nila nga giplanohan.Boot man matud pa niini nga mu-atras apan nahadlok usab kini sanglit duna matud pa’y nagbantay kanila.Kini usab matud pa ang iyang ‘first mission’. Pagsaysay pa ni Arnel nga siya lang ang tigkuha og mga alahas sa shop apan ang nagdala niini atol sa ilang pag-ikyas mao ang kauban niini nga si Tony Boy.

Samtang karong adlawa gipasaka na ang kasong robbery batok ni Arnel ug sa laing pang kauban niini’ng nasikop nga sila James Anthony Gomez, Jolyvyn Quirante, Filomeno Candelaria Jr. ug Roel Suminggit.

Padayon usab ang hot pursuit operation batok sa lain pang 14 nga mga suspect nga dala ang giingong nakuha nga alahas ug kwarta nga gibana-bana nga muabot sa P163-M. (with reports from Bombo Eric Amaro)