CEBU CITY – Pipila usab ka mga personalidad ug politiko ang nagpadayag sa ilahang pahasubo sa pagbiya sa kalibutan ni Cebu City Mayor Edgardo Labella kagahapon.

Sa usa ka statement, gihulagway ni Cebu Governor Gwendolyn Garcia nga usa ka dakung kawag-on ang pagkamatay ni Labella ilabi na nga usa kini nga dedicated public servant ug gitahud nga kauban sa buhat.

Mensahe ni Cebu Governor Gwendolyn Garcia

Nagpadayag usab sa ilahang kaguol ang mga Mayor sa Metro Cebu nga silang Mandaue City Mayor Jonas Cortes, ug si Lapu-Lapu City Mayor Junard ‘Ahong’ Chan, apil na si Talisay City Mayor Samsam Gullas.

Alang kang Cortes, nagpasalamat kini sa gipakitang dedikasyon ug kagugi ni Mayor Labella ilabi na sa paghatag og serbisyo sa mga sugboanun ug sa dakbayan sa Sugbo.

Samtang, si Mayor Chan kay malaumon nga magmalipayon karon si Mayor Labellan sa kiliran sa Labawng Makagagahom.

-- ADVERTISEMENT --

Si Mayor Gullas kay iyahang gibutyag nga pareho silang mga neophyte mayors o mga bag-o palang nga Mayor ni Labella sa dihang nakadaug sa ilahang tagsa-tagsa ka syudad niadtung 2019.

Apang, iyahang kining gidayeg sa abilidad ug katakus ni Labella isip usa ka lider bisan paman sa hagit sa pandemya ug sa iyaha na usab nga kaugalingong panglawas.

Sapagkakaron ang haya ni Cebu City Mayor Edgardo Labella kay anaa karon sa Cosmopolitan Funeral Homes nga nahimutang sa Nivel Hills, Lahug, Cebu City.

Adunay mahitabong public viewing hangtod sa adlaw nga Martes, Nobyembre 23, 2021.