CEBU CITY – Mihulpa ang pipila ka mga nitso sa sementeryo sa Barangay Labangon, syudad sa Sugbo, niadtung nakalabay nga huwebes.

Gisaysay ni Cebu City Councilor Dave Tumulak nga nakadawat kini ug report nga mikabat sa upat ka mga nitso ang mihulpa diin nakita na ang gilubong nga mga patay’ng lawas.

Matud ni Tumulak nga dali niini nga gipa-cordoned ang area samtang girekober ang mga patay’ng lawas ug pagpahibalo sa mga pamilya niini, ingon man ang subling pagpalubong sa Calamba cemetery.

-- Advertising --

Gidugang pa sa konsehal nga ilaha nang gipasusi sa Cadaver Section sa City Health ang mga death certificates, ingon man ang hinungdan sa kamatayon ug ang pagsusi kung asa kini gikan nga punerarya.

Gikabalak-an sa lokal nga kagamhanan sa syudad nga posibling namatay gumikan sa COVID-19 ang maong mga patay gumikan kay gilubong kini sa tuig 2020 hangtud na ning kasamtangang tuig.

Hinuon, dali nga gipadalhan ug team ang area arun nga ipahigayon ang pag-disinfect, ingon man nga mabantayan ang sam-ang ug mapabilin kini nga sirado.

Nakita usab ni Tumulak nga sub-standard ang mga materyales nga gigamit sa pag-gama sa maong mga nitso.

Subay niini, giawhag sa opisyal ang mga nag-manage sa mga sementeryo nga maghimo ug nitso gamit ang mga ‘standard grade materials’ arun nga malikayan ang susama nga insidente.// EKP