TOMATO ATTACK. Gilabay sa mga rallyista ang mga poster sa hulagway ni Pangung Rodrigo Duterte og kamatis atol sa ilang rally sa dalan Colon, dakbayan sa Sugbo. (Hulagway ni Bombo Joann Gantalao)

CEBU CITY — Kinahanglang mobarug ug makigbisog ang mga Pilipino alang sa kaugalingong katungod sa labing daling panahon.

Kini ang nahimong tambag ni Jaime Paglinawan, sa BAYAN Central Visayas, atol sa gipahigayon nilang rally sa anibersaryo sa EDSA revolution kagahapon.

Matud ni Paglinawan nga nasaksihan niya ang pait nga kasinatian sa mga Pilipino kaniadto kung diin nahikawan ang ilang katungod sa pagpadayag tungod sa militarisasyon.

-- Advertising --

Nakita usab niini nga susama gihapon ang nahitabo sa kasamtangang panahon gumikan kay apektado ang mga urban poor ug mga mag-uuma sa mga lakang sa kasamtangang administrasyon.

Dugang pa ni Paglinawan nga nahitabo na sa ning panahon ang giingong pagpangharass sa mga kabus tungod sa mga lakang sa gobyerno.

Hinungdan nga nakapangutana kini kung molihok pa ba ang mga Pilipino kung atakehon ang kaugalingong pamilya.

Kahinumdumang nag-rally ang BAYAN Central Visayas, kauban ang uban pang mga civic groups atol sa ilang rally kagahapon kung diin misuroy sila sa OsmeƱa Boulevard paingon na sa dalan Colon aron ipadayag ang ilang kahingawa ngadto sa gobyerno.

Gitak-op sa mga grupo ang maong rally pinaagi sa paglabay og tamatis ngadto sa mga poster sa hulagway ni Duterte.

‘Support Duterte’

Napaglantawan ni Cebu City Mayor Edgardo Labella nga mahimo kaayo nga magtinabangay ang mga Pilipino alang sa pagmentanar sa demokrasya nga walay armas.

Atol sa selebrasyon sa EDSA People Power Revolution kagahapon, mipadayag ang mayor nga mahimong magkahiusa ang tanang katawhan aron barugan ang ilang katungod.

Gani, mipahinumdom si Labella nga imentenar ang pagkamahinungdanon sa maong “bloodless” revolution kung diin gibarugan kini sa mga Pilipino batok sa diktaduryal nga gobyerno, sa nakalabay nga 34 ka tuig.

Hangyo karon ni Labella nga ipadayon sa mga Pilipino ang ilang suporta ngadto ni Presidente Rodrigo Duterte.

Kini gumikan kay nakigbisog kini batok sa kriminalidad, ilegal nga drugas, ug korapsyon sa gobyerno. (with reports by Bombo Jun Salde and Bombo Joann Gantalao/gn)