CEBU CITY — Natanggong sa prisuhan ang usa ka lalaki human gituohang nanunggab sa kanhi hinigugma niini sulod sa barangay hall sa Brgy. Bolinawan, Carcar City, Cebu.

Nadakpan ang suspek nga si Luis Christian Semblante samtang nagpaalim sa tambalanan ang ex-girlfriend niining si Clavel Capistrano.

Matud ni Police Master Sgt. Von Tecson sa Carcar Police Station nga namugos si Semblante nga makigbalik ngadto ni Capistrano human sa panahon nga wala sila nagkasinabot.

-- Advertising --

Naghusay ang duha sa barangay hall sa atubangan ni Konsehal Aristelles Paninsoro kung diin miinsister ang babaye nga dili na makigbalik ngadto sa iyang ex-boyfriend.

Human nga wala makadawat ang suspek sa kapalaran nga pait pa sa panyawan, dali kining nibunlot sa dala niining kutsilyo ug gidunggab ang ex-girlfriend niini sa makadaghang higayon.

Nakuratan ang mga tawo sulod sa barangay ug daling misibat ang suspek.

Apan nikuyog si Semblante ngadto sa kapulisan ug naghinuktok human sa makakuyaw nga panghitabo.

Nag-atubang og tukmang kaso ang maong suspek samtang gidala dayon sa tambalanan ang biktima gumikan sa samad-dinunggaban nga na-angkon niini.