Nagkalambo na gayud ang ESports community dinhi sa Pilipinas human nga unang gilusad sa nasud ang maong natad isip major sporting event sa nakalabay nga Southeast Asian Games.

Karon, naninguha ang usa ka gaming agency nga himoong usa ka professional career ang esports sa nasud.

Nakig-alayon karon ang Tier One Entertainment ni Alodia Gosengfiao sa Lyceum of the Philippines University alang sa kurso nga Bachelor of Science in Esports.

-- Advertising --

Matud ni Tryke Gutierrez sa Tier One nga anaa na sa 80 porsyento ang pag-draft sa curriculum ubos sa BS Esports program.

Kung mahinayon man ang maong kurso, makapili ang usa ka tinun-an kung game design ba o esports management ang posibleng major niini.

Dugang pa niini nga gipaabot nila ang suporta gikan sa gobyerno ug sa publiko aron lang maaprubahan sa Commission on Higher Education ang maong kurso.

Gihimug-atan ni Gutierrez nga dako og tabang ang maong kurso aron lang mapalambo ang natad sa esports.

Gikatakda nilang isumiter ang draft sa curriculum design sa BS Esports karong Marso 4 sa CHED.

Kung maaprubahan, posibleng ilusad ang maong kurso karong tuiga.