CEBU CITY — Gipangita sa kapulisan ang aktibo nga barangay konsehal human nga naka-ikyas sa dihang naglipay-lipay sa magbugnawong lawak kauban ang kabit niini nga usa ka magtutudlo.

Una niini, gisaysay ni Police Corporal Police John Vincent Balicoco, sa Pinamungajan PNP, nga nagpakitabang kanila ang asawa sa naasoy nga konsehal human nga nasundan niini sa usa ka lodge sa lungsod sa Pinamungajan.

Matud pa nga sa pagsulod nila sa naasoy nga lodge, gituktok sa kapulisan ang lawak, apan wala gayud kini mangabli hinungdan nga mihangyo na ang mga otoridad sa mga staff sa naasoy nga lodge nga ablihan ang kwarto.

-- Advertising --

Apan giingong wala na ang duha sa lawak human nga daling naka-ikyas ang konsehal.

Nasikop ang babaye human nga natagak ang airconditioner sa pikas lawak.

Nasayran nga mikamang sa kisame ang naasoy nga magtutudlo ug didto milahos sa pikas lawak, apan walay swerte gumikan kay natagak ang aircon hinungdan nga nasakpan kini.

Gitago sa ngalan nga Magdale ang naasoy nga maestra, 38 anyos, lumad nga taga dakbayan sa Davao, usa ka elementary teacher sa dakbayan sa Toledo, samtang ang konsehal mao si Boyet, 49 anyos, ug kanhi kapitan sa usa ka barangay sa susama nga dakbayan.

Nagtingkagol karun sa Pinamungajan PNP detention cell ang magtutudlo ug kasong concubinage ug malicious mischief ang ipasaka batok sa duha.