CEBU CITY — Nagkagubot ang mga tawo sa atubangan sa usa ka merkado sa Pagadian City sa dihang nitumaw ug nigimaw ang dakong bitin bisan pa man og nagbaha ang kalsada.

Makita sa video nga gi-upload ni Rochel Abdon Quadalquiver, nagtinabangay ang duha ka mga lalaki sa daplin aron lang madakpan ang taas nga bitin diin naglangoy-langoy pa kini sa baha.

Gigunit sa lalaki ang ikog sa maong bitin, samtang gigunit usab sa usa ang sako aron masulod ang maong mananap.

-- Advertising --

Apan gumikan sa hilabihang gidak-on niini, nitabang usab ang laing usa ka lalaki aron madakpan ang bitin ug masulod sa sako.

Pagduda karon sa mga tawo, nagagikan sa imburnal ang dakong bitin ug nigawas lang kini sa dihang nibaha ang kalsada human sa kusog nga pagbundak sa uwan.

Nakig-alayon ang tulo ka mga lalaki sa mga barangay officials alang sa paghipos ug pag-atiman sa maong bitin. (gn)