CEBU CITY-Mi-arang arang ang pamati sa usa ka inahan nga namatyan og anak sa nahitabong Boljoon road accident human matud pa na-estorya ug nagakos ang anak niini kinsang ang espiritu misulod sa lawas sa laing estudyante.

Kini ang gibutyag ni Arlyn Georfo, inahan sa biktima nga si Jefferson Georfo.

Pagsaysay ni Arlyn nga sukad sa panghitabo walay oras nga dili siya magbakho ug maghilak tungod kay dili gyud niya madawat ang nahitabo sa iyang anak. Gani, nagkanayon pa kini nga mawad-an gyud siya sa panimoot kung ilubong na ang iyang anak tungod kay dili niya kaya nga mawala kini sa hingpit.

-- Advertising --

Apan kalit nga nahupay ang iyang gibati sa dihang duna matud pay estudyante nga babae ug lalaki ang miduol kaniya atol sa haya sa iyang anak ug migunit sa iyang kamot ug miingon nga ‘pasaylo-a ko ma nga wala ko kapananghid nimo, i-ampo ko ma’.

Midulot matud pa sa iyang kasing-kasing ang maong mensahe ug iyang gigakos ang maong estudyante.

Mipaambit usab kini sa nahitabo sa wala pa madisgrasya ang iyang anak nga milakaw kini nga wala niya maka-amin nga unta kada lakaw niini mu-amin man gyud kini.

Tungod matud pa sa panghitabo makaya na niya nga dili muhilak kung maghisgot sa nahitabo apan sa gihapon sakit para niya ang nahitabo.

Nanghinaot nalang si Arlyn nga tabangan usab siya sa iyang anak nga makadawat sa panghitabo.

Dili man gani unta kini mudawat sa mga daghang hinabang tungod kay wala matud pay gamit, tungod kay ang kinabuhi sa iyang anak dili gyud kabayran bisan unsa pa.