Hulagway gikan sa PRO-7

Plano karon sa bag-ong director sa Police Regional Office (PRO)-7 nga pakusgan pa ang kampanya batok sa ilegal nga drugas ug internal cleansing program sa iyang mga sakop.

Kini ang gipadayag ni Police Brigadier General Albert Ignatius Ferro atol sa unang adlaw sa iyang bag-ong katungdanan.

Matud ni Ferro nga dili lang intelligence-driven ang operasyon batok ilegal nga drugas ang pagahimuon kun dili i-educate usab sa iyang mga sakop ang mga kabatan-onan kalabot na sa dautang epekto sa drugas.

-- Advertising --

Gisaysay sa bag-ong regional director nga sa dihang nagdumala kini kaniadto sa Drug Enforcement Group, nipahigayon kini og programa alang sa mga kabatan-onan kabahin sa drugas.

Sa pikas nga bahin, gihan-ay usab ni Ferro ang mga dili angayang buhaton sa mga sakop ubos sa iyang liderato.

Mipahimangno usab kini nga tumanon sa tanang mga sakop ang polisiya ug mga implementasyon gikan sa national headquarters.

Tungod niini, striktong mipahinumdom si Ferro nga likayan sa mga sakop sa PRO-7 ang bisan unsang ilegal nga sugal, lakip na ang casino ug pagduwa og golf sa adlaw nga tingtrabaho.