CEBU CITY – Laing indibidwal nasad ang nihatag og pasidungog sa Sugbo og sa nasod tungod sa awar niini nga nakuha karong panahon sa pandemya.

Usa kini ka pamatuod, nga bisan panahon sa krisis mopatigbabaw gyud ang maayong personalidad sa usa ka Pilipino.

Nakadawat og award ang Cebuano Chef nga si Joseph Buddy Amodia Jr., ana naasoy nga award mao ang 1st Filipino Heroes Award, usa ka proyekto ug gipasi-ugdahan sa Filipino Ethnic Community of the Family Federation for World Peace and Unification nga nakabasi sa United States.

Si Amodia kasamtangang nagpuyo karon sa Saskatchewan, Canada , ug nahatagan kinig pasidungog gumikan sa gihimong abag niini panahon sa pandemya.

Nasayran nga si Amodia giila sa iyang community service sa mga kabos pinaagi sa financial aid ug wheelchair donations.

-- ADVERTISEMENT --

Gipasidunggan usab siya sa iyang pagkamatinud-anon human niya giuli ang usa ka pitaka nga iyang nakit-an nga adunay sulod nga mga bililhon nga butang.

Sa eksklusibong pakighinabi kang Joseph Buddy T. Amodia Jr. sa Bombo Radyo Cebu, mibutyag kini nga wa kini magdahom sa maong pasidungog gumikan usa lang kini ka ultimo nga indibidwal.

Wala usab kini ideya kung si kinsa ang ninomena kaniya apan mapasalamaton kaayo kini sa nakuhang award. Ang pasidungog gitumong aron pasidunggan ang mga first responders ug health workers nga nagsakripisyo og daghan taliwala sa pandemya.

Gihimo usab kini aron sa pagpasiugda ug paghatag pag-ila sa gibuhat sa mga Pilipino alang sa uban ug alang sa kaayohan sa Amerika ug Canada.