CEBU CITY-Na-uyonan ni Office of the Presidential Assistance for the Visayas (OPAV) Assistant Secretary Jonjie Gonzales ang mga pamahayag ni Presidente Rodrigo Duterte atol na sa State of the Nation Address niini kagahapong adlawa.

Gibutyag ni Asec. Gonzales sa pakighinabi niini sa Bombo Radyo Cebu sa tulumanong Bombohanay Bigtime nga sa gihapon prayoridad sa presidente ang pagluwas sa kinabuhi sa mga Pilipino taliwa niining nasinati nga pandemya sa nasud.

Matud pa nga nakatutok si Presidente Duterte sa pakigbatok sa COVID-19 taliwa unya sa hinayhinay nga pag-abli sa ekonomiya. Giingong bisan pa man unya sa subling pag-agak sa administrasyon sa ekonomiya sa nasud, dili sa gihapon pasagdan sa gobyerno ang pagsiguro nga dili na mukatap pa ang virus lukop Pilipinas.

-- Advertising --

Subay niini, gipahibalo usab ni Gonzales nga posible nang ipaubos sa General Community Quarantine (GCQ) karung Agosto 1 ang dakbayan sa Sugbo base usab sa pamahayag ni Task Force COVID-19 Chief Implementer General Roy Cimatu.

Apan giingong kinahanglan sa gihapon nga pangandaman ang mga lakang nga dili subling mudaghan ang kaso sa COVID-19 ug dili na mabalik sa ECQ ang dakbayan. | SBR