CEBU CITY — Giisyuhan sa Philippine Drug Enforcement Agency (PDEA) ug sa Anti-Money Laundering Council (AMLC) ang freeze order ngadto sa balay sa giingong konektado sa Kuratong Baleleng drug group kaganiha sa Brgy. Guadalupe, dakbayan sa Sugbo.

Kini human nga miisyu ang Court of Appeals sa maong order batok nilang Artemio ug Daisy Salas kinsang gituohang myembro sa maong sindikato nga gipanguluhan ni kanhi Ozamiz City Mayor Reynaldo Parojinog.

Nangunay mismo si PDEA Director General Wilkins Villanueva sa pag-serve sa freeze order kung diin mikabat ang maong property og P5-million.

-- Advertising --

Matud ni Villanueva nga anaa nakapangalan sa magtiayong Salas ang maong balay ug padayon pang gisuta ang uban pang properties sa drug group nga nahimutang sa Sugbo, Leyte, ug sa Ozamiz City.

“Why are we doing this? The number one goal of drug syndicates is to earn money. We are just completing our job. By freezing their properties, these drug personalities will no longer be able to use their assets earned from illegal drug transactions to further run their operations … Gisahon nato sila sa ilang sariling mantika,” sigon ni Villanueva.

Kasamtangang natanggong sa prisuhan ang magtiayong Salas human nadakpan sa usa ka operasyon kaniadto. (with reports by Bombo Joann Gantalao)