CEBU CITY — Anaa karon sa luwas nga kahimtang ang dul-an 300 ka mga indibidwal human nabanlas sa dagkong balud sa kadagatan ang 76 ka mga panimalay kaganihang kaadlawon sa Brgy. Ibo, dakbayan sa Lapu-Lapu.

Kini subay na sa paghaguros sa tropical depression ngadto sa pipila ka bahin sa Sugbo sukad pa kagahapon.

Matud ni Ibo Brgy. Councilor Leo Yape nga hilabihang naigo sa storm surge ang Sitio Apro nga usa ka coastal area sa barangay.

-- Advertising --

Daghang mga residente ang nakalitan sa maong kusog nga bawod hinungdan nga dali silang na-rescue sa mga sakop sa City Disaster Risk Reduction and Management Office (CDRRMO).

Nagpasalamat si Yape gumikan kay walay nakalas nga indibidwal ug namahuway karon ang mga apektadong residente sa Ibo Elementary School.

Nanawagan karon ang konsehal sa publiko nga modonar og mga sinina, gamit sa balay, ug toiletries sanglit tapot-lawas lang ang dala sa mga na-rescue nga residente.

Daling mitunol og tabang si Lapu-Lapu City Mayor Junard “Ahong” Chan ngadto sa apektadong pamilya sama na lang sa banig aron kahigdaan sa mga residente, food ug non-food packs, ug uban pa.

Gisiguro usab sa mayor ang paspas nga pagpatulod sa social housing project sa Canjulao aron himoong kabalhinan sa mga apektadong residente.