CAGAYAN DE ORO CITY – Ipatawag sa konseho ang kadagkuan ug mga tigdumala sa kompanyang Food Panda delivery services gumikan sa reklamo sa mismong riders niini dinih sa syudad.
Kini human unang nag-rally ang delivery riders gumikan sa giingong dili makiangayon nga pagtratar kanila sa maong kompanya.
Miingon si Konsehal Malvern Esparcia nga tipik sa gi-demanda sa delivery riders ang pagkibhang sa ilang kinitaan ug walay regular nga buhatan nga kasumbungan unta sa mga reklamo niini.
Giila sa konseho ang dakong papel sa maong kompanya sa miaging kusog pa ang epekto sa pandemya saa COVID-19 sa dakbayan.
Samtang uyon si SK Federation President Kag John Michael Seno nga mapatawag ang duha ka panig sa maong kompanya sa pagdungog sa konseho sa dakbayan.
Kini aron direkta usab masuta kon gabayad pa sa buhis sa dakbayan ang maong Manila-based nga delivery services.
Miingon si Seno nga gusto usab nila matin-awan kon sabotahe ba sa pipila ka delivery drivers nga mobalibad sa tibuok nga salapi nga ibayad sa ilang orders kay wala pa’y mga pangsukli.
Samtang sa panig usab ni City Vice Mayor Jocelyn ‘Bebot’ Rodriguez,dako kining bukas sa pakisusi sa tulo ka komitiba sa konseho aron mahatagan usab sa igong seguroidad ang panarbaho sa maong delivery drivers nga permi anaa sa peligro sa ilang paghatag serbisyo sa ilang customers dinhi sa dakbayan.
