CAGAYAN DE ORO CITY – Ipaubos sa ‘case build-up’ ang sobra 900 ka 3rd level officers sa Philippine National Police o PNP nga naglakip sa 20 ka senior officials gikan sa Police Regional Office 10 nga nakabase sa Camp Alagar ning syudad.
Kini ang pasalig ni DILG Secretary Benjamin Abalos Jr kabahin sa pangutanan kon unsay dangatan sa maong mga opisyal nga nakaduso na sa ilang courtesy resignation ngadto kang Pres Bongbong Marcos.
Gibutyag ni Abalos nga dili lang simple nga pagkatangtang apan dut-a’g kaso sa gobierno kadtong pipila ka pulis nga dunay igong basehan nga kini nalambigit sa pagbaligya’g ilegal nga droga o protektor sa mga sindikato.
Samtang manubag sa kadagkuan sa DILG ug PNP ang nag-inusara nga police colonel gikan sa Police Regional Office 10 nga wala gyud moduso’g courtesy resignation.
Kini bisan kon una nang gipasalig ni Abalos nga walay silot nga madawat kadtong senior officers sa PNP nga mobalewala sa iyang hangyo nga mo-bakante una sa katungdanan.
Siya miingon nga gusto usab sa PNP ug DILG nga masayod kon nganong nagdumili ang maong koronel nga imbestigaran ang iyang kaugalingon.
Sa unang interbyu sa Bombo Radyo,gibutyag ni PRO 10 spokesperson Police Maj. Joann Navarro nga nagdumili pagduso’g resignation ang maong opisyal kay daw duol na kining mo-retiro sa serbisyo.
