-- ADVERTISEMENT --

CAGAYAN DE ORO CITY – Ipadala sa konseho ang kopya sa resolusyon kang Pres Rodrigo Duterte nga nag-absuwelto kang Cagayan de Oro 1st District Rep Rolando ‘Klarex’ Uy kabahin sa pasangil ni Kag Zaldy Ocon nga nalambigit kini sa illegal nga droga dinhi sa dakbayan.

Kini human unang giakusar sa konsehal nga apil si Klarex sa listahan sa narco-politicians nga gihuptan ni Duterte.

Gibutyag ni Kag Edgar Salcedo nga gawas kang Duterte,hatagan usab nila’g kopya si PDEA Dir Gen Wilkins Villanueva ug PNP chief Gen Dionardo Carlos.

Una niini,gikasakit sa pamilyang Uy ang walay basehan nga akusasyon ni Ocon.

Si Kag Edgar Salcedo

Samtang gipanghimakak ni Ocon nga gitawag niya’g druglord si Uy sa iyang pipila ka programang binayran sa radyo ning syudad.

-- ADVERTISEMENT --

Miingon si Ocon nga nangutana lang daw siya nga angayang hataga’g katin-awan sa kongresista ang maong isyu.

Gibutyag sa konsehal nga tungod sa imbestigasyon sa committee of the whole sa konseho,nadaot ang iyang pangalan atubangan sa katawhan sa syudad ug lalawigan.

Gihimakak usab niini nga politika ang motibo sa kanunay niya pagbalik-balik sa pasangil batok kang Klarex.

Una nang giklaro sa PDEA-10 ingon man sa PNP nga walay ilang rekord nga magtumbok kang Uy nga nalambigit sa ilegal nga kalihukan sa droga sukwahi sa gipamugos ni Ocon.

Si Kag Zaldy Ocon

Dumduman usab nga may mikaso na’g cyber libel ug oral defamation kang Ocon tungod sa iyang pagpamasangil sa kongresista apan alang kaniya dili na kini bag-o kay giingong naanad na siya niini.