CAGAYAN DE ORO CITY – Gilusob sa hiniusang puwersa sa provincial ug municipal police offices ang cockpit arena nga gi-rentahan sa pipila ka retiradong pulis ug bigtime gamblers diha sa Purok 1,Brgy Lagtang,Alubijid,Misamis Oriental.

Kini human nakasupak ang nag-operate sa Alubijid Cockpit Arena sa gabayan sa IATF resolusyon nga gidili una ang pagpadula sa mga sugarol tungod sa bahad sa tinakdanay sa COVID-19.

-- Advertisement --

Miingon si Alubijid Municipal Police Station commander Lt Concordio Taña nga inisyal nga 32 ka sugarol ang ilang nadakpan samtang nakaikyas usab ang retiradong pulis nga si Iraz Zari nga nagpadagan sa bulangan pagronda kagahapong adlawa.

Miingon si Taña nga gawas sa mga manok nga nabihag,nabawi usab nila ang 42 ka motorsiklo,5 ka tricabs ug 5 ka sakyanan nga iya sa mga sugarol nga midagsa sa maong bulangan.

Si Alubijid Municipal Police Station commander Lt Concordio Taña

Samtang sa pikas bahin,giingong walay pagsupak apan gipasalamatan ni Mayor Emmanuel Jamis ang PNP nga milusob sa mga sugarol sa cockpit arena.

Miingon si Jamis angay lamang bungkagon ang maong virus super spreader activity kay dayag nga kasupakan sa resolusyon sa IATF.

Si Mayor Emmanuel Jamis

Gikompirmar usab sa mayor nga may permit ang Alubijid Cockpit Arena apan wala mangayo’g pagtugot nga mohimo kini’g padula sa mismong higayon nga naka-general community quarantine o GCQ with restriction ang Misamis Oriental.