CAGAYAN DE ORO CITY – Moduso na sa ilang kadidatura ang mga kandidato ubos sa alyansa sa Padayon Pilipino ug Centrist Democratic Party of the Philippines sa Comelec Office sa syudad ning adlawa.

Gibutyag ni Phividec administrator Jose Gabriel ‘Pompee’ La Viña kinsa magpapili pagka-mayor nga sa dili pa sila moduso sa ilang sertipiko de kandidatura,motambong una sila sa santos nga misa sa Mount Carmel Church sa Brgy Carmen karong alas otso sa buntag.

Miingon si La Viña nga kuyog niya sa pagduso sa certificate of candidacy si Kag Jocelyn ‘Bebot’ Rodriguez kinsa magsilbi niya nga bise-mayor sa 2022 elections.

Kandidato pagka-kongresista sa unang distrito si Kag Lordan Suan samtang magpa-subli si Deputy House Speaker ug incumbent 2nd District Rep Rufus Rodriguez.

Magsilbi usab nga mga kandidato pagka-konsehal sila Aga Suan;Jerry Sabanal;Dures Tagayuna;Sultan Mandangan Darimbang;Atty Alvin Calingin;DJ Bernie Bitok-Bitok ug Joey Abbu alang sa unang distrito.

-- Advertisement --

Samtang magpapili usab sa 2nd district pagka-konsehal ang igsoon ni Gob Bambi Emano nga si Yvy Emano ingon man sila si Nixon Baban; Marlon Bongay;Tony Abejuela; Jasmin Borja ug Engr Roger Villazorda.

Si Phividec administrator Jose Gabriel ‘Pompee’ La Viña

Samtang gikompirmar usab ni mayoralty candidate 1st District Rep Rolando ‘Klarex ‘Uy ang pagduso sa kandidatura sa ilang mga kauban sa Comelec sa syudad unya alas dos sa hapon.

Miingon si Cong Klarex nga magsilbi niya nga bise-mayor si Kag Edna Dahino samtang mopuli sa iyang posisyon si City Vice Mayor Kikang Uy ug makig-atbang usab ang negosyante nga si Irene Floro kang Deputy House Speaker ug incumbent 2nd District Rep Rufus Rodriguez.

Gibutyag ni Uy nga kabahin sa ilang kandidato pagka-konsehal sa unang distrito sila si incumbent Councilors Romeo Calizo;George Goking;Jay Pascual;Roger Abaday;Reuben Daba kuyog ang new comers nga sila si Imee Moreno;Dr Ferdinand Miranda ug kanhi LTO 10 Director Oscar Salcedo.

Kauban sa Uy-Dahino ticket sila si incumbent Councilors Girlie Balaba;Ian Mark Nacaya;Suzette Magtajas-Daba;Maria Lourdes Gaane;Gusa Brgy Kap Marlo Tabac;kanhi Kag Dometilo Acenas Jr ug Pastor Demver Andales.

Sa pikas bahin,modagan nga walay partido o independiente sa ikaupat na ka higayon sa pagka-mayor ang nabantog nga doktor sa makina nga si Felix Borres ning syudad.

Kini human giduso usab niini ang iyang certificate of candidacy sa maong posisyon sa Comelec kagahapong adlawa.

Miingon si Dr Borres nga napugos kini pagdagan tungod sa hangyo sa katawhan aron magsilbi nga alternatibo nga kandidato pagka-mayor batok sa dagkong mga pangalan sa politiko ning syudad.

Si 1st District Rep Rolando ‘Klarex ‘Uy

Gisaad ni Borres nga kon mapili kini pagka-mayor,pangitaan niya sa epektibong sulbad ang grabe nga trapiko ug ang mga pagbaha sa pipila ka bahin sa syudad kon dunay mga kusog nga pagbundak sa pag-ulan.