CAGAYAN DE ORO CITY – Gipili na sa Ms Universe Philippines Organization ang 75 ka kandidata nga magpadayon sa ilang karera aron makuha ang korona sa Ms Universe Philippines ning tuiga.

Pinaagi sa facebook page sa MUPH, gipa-ambit niini ang mga litrato sa mga kandidata nga napili-an, sul-ob ang ilang mga swimsuit. Lakip sa top 75 ang aktres na si Kisses Delavin, kinsa usa sa fan favorites.

-- Advertisement --

Nakasulod usab sa listahan ang Asia’s Next Top Model cycle 5 winner nga si Maureen Wroblewitz ug ang TikTok content creator na si Rousanne “Ayn” Bernos.

Padayon gihapon ang pakigsangka sa pageant veterans nga sila Ms Globe 2019 2nd runner-up Leren Mae Bautista, Binibining Pilipinas Tourism 2012 Katrina Dimaranan ug Steffi Rose Aberasturi.

Ang pambato sa Misamis Oriental nga si Chella Grace Falconer ug Cagayan de Oro City nga si Vincy Labadan Vacalares ang nakasulod usab sa top 75.

Ang mga kandidata gipili subay sa mga sangputanan sa ilang Headshot Challenge ug Intro Video Challenge sa miaging mga adlaw.

Apan makunhuran pa ang top 75 sa umaabot nga adlaw diin ang top 30 nga kandidata ang mahatagan sa higayon nga makaapil sa preliminary competition.

Gitakdang itugyan ni reigning Ms Universe Philippines Rabiya Mateo ang iyang korona sa Setyembre 25 ning tuiga.

Hangtud karun, wala’y pahibalo pa kon asa himoon ang Ms Universe Philippines 2021 grand coronation.