CAGAYAN DE ORO CITY – Mosang-at na usab sa ilang certificate of candidacy ang bando sa One MisOr -One CdeO ni City Mayor Oscar Moreno sa provincial office sa Comelec diha sa Luna Street sa syudad ning adlawa.

Apan giklaro ni Moreno nga ipaagi lamang niya sa iyang representante ang pagduso sa CoC aron likayan ang pagdagsa sa ilang political supporters tungod sa pandemya sa COVID-19.

Magsilbing bise-gobenador ni Moreno si kanhi partylist representative Ariel ‘Aye’ Hernandez.

Dugang sa mayor nga may himoon usab sila nga pagtambong sa alas dose nga santos nga misa sa San Agustin Cathedral ugmang adlawa ug kini sundan sa virtual conference aron ipaila-ila ang ubang mga kandidato sa Moreno-Hernandez tandem sa lalawigan sa 2022 elections.

Si City Mayor Oscar Moreno

Una nang nakaduso ang grupo nila ni Gov Bambi Emano sa Padayon Pilipino-Lakas CMD-NP alliance sa miaging adlaw’ng Martes.

-- Advertisement --

Ikasangka ni Moreno ang alyado ni Emano nga si Gingoog City Vice Mayor Pedro Unabia ug 2nd District Rep. Juliette Uy.

Samtang si Hernandez,ang kontrahan usab ni incumbent Vice Gov Jigjag Pelaez ug sa laing igsoon nga si kanhi Vice Gov Joey Pelaez.

Si Emano kinsa anaa sa katapusang termino ang atbangan usab anak ni Rep Uy nga si Villanueva Mayor Jennie Uy sa pagka-kongresista sa ikaduhang distrito sa lalawigan.

Makigharong usab si re-electionist nga si 1st Rep Christian Unabia batok sa mga pambato nila ni Moreno ug Uy sa unang distrito sa probinsya.