BUTUAN CITY – Gitutukan sa kadumalahan sa Agusan National High School kon Agusan High sa pagsugod na ning adlawa sa pagbukas sa klase alang sa school year 2021-2022 ang pagpang-apod apod gilayon sa ilang mga gi-andam nang learning modules.

Sa eksklusibong pakighinabi sa Bombo Radyo Butuan, gipadayag ni school principal Roel Gabor nga tibuok adlaw sulod sa lima ka adlaw silang mang-apod apod og mga learning modules alang ngadto sa mga magtutungha gikan sa Grade 7 hangtud Grade 12.

Kini human na-apektuhan ang distribusyon niini sa gipatumang Modified Enhanced Community Quarantine kon MECQ sa 76 ka mga barangay ning siyudad.

Sigon ni Gabor, misaka usab ngadto sa kapin 12-mil ang ilang mga enrolees karon nga school year tungod sa pagsira na sa senior high school sa Caraga State University kon CSU ug pagsira na sa academic strand sa Butuan City School of Arts and Trade kon BCSAT.

Sa pagkakaron, wala matud pa sila’y nasinatiang problema tungod kay gi-usab nila ang na-andan na nilang sistema sa ingon masigurong masunod nila ang mga nagtunhay nga health protocols.

-- Advertisement --

Tungod sa padayong pagsaka sa mga kaso sa COVID-19 ning siyudad, ipadayon sa maong tunghaan ang pag-adaptar sa tulo ka mga learning modalities rason nga wala’y mahitabong face-to-face classes.

Apil niini ang pure modular, online ug digital learnings. Ang gamay nga problemang ila karong gisolusyonan mao ang shifting sa klase sa mga bata gikan sa online ngadto sa digital ingon man digital ngadto sa online ug modular ngadto sa online.

Gipahibalo usab sa principal ang mga ginikanan nga taliwa sa nasinatian karong pandemyang hatud sa COVID-19, naningkamot silang mahatagan og de-kalidad nga edukasyon ang ilang kabataan.

Nanawagan usab siya sa tanang mga ginikanan ug guardians nga musunod sa gipatuman nilang patakaran sa pagkuha sa modules subay na usab sa ilang pagsunod sa protocols nga gipagawas sa Inter-Agency Task Force kon IATF.