BUTUAN CITY- Gidagsa kagahapon sa mga voter’s registrants ang unang adlaw sa extension ang voter’s registration nga gipahigayon sa SM City Mall ning syudad.

Sa eksklusibong pakighinabi sa Bombo Radyo Butuan kang Atty. Samuel Rollo ang City election officer gibutyag niini nga muabot sa 424 ang kinatibuk-ang narehistro kagahapon lang adlawa ug posibleng mudaghan pa kini sa mga sunod nga adlaw hinungdan nga mihangyo karun ang buhatan nga kung mahimo samtang sayo pa, magparehistro na og dili na paabuton pa ang deadline aron sa ingun nga dili magkara-kara sa pagparehistro.

Sumala pa ni Atty. Rollo nga ang maong extension sa voter registration nga gikan lamang sa lunes hangtod byernes nga magsugod sa alas 8 sa buntag hangtod sa alas 5 sa hapon apan sa katapusang adlaw sa pagparehistro kondiin natunong sa adlaw nga Sabado, ipadayon gihapon nila ang rehistrasyon.

Gibutyag pa sa opisyal nga susama lang gihapon sa kanidto nga rehistrasyon ang dalhon nga mga requirements apan magdala lamang og kaugalingon nga ballpen tungod hugot nga ginadili ang pagpul-puli niini ilabina nga anaa pa tunga tunga sa covid-19 pandemic ang syudad.

Gisugyot usab niini ang kanunay nga pagsunod sa health protocols aron mahimong luwas ang tanan sa gipahigayong rehistrasyon

-- ADVERTISEMENT --