BUTUAN CITY – Duna’y gimugnang Tricycle Task Force ang lokal nga kagamhanan ning syudad alang sa mga orange tricycle drivers nga apektado sa pagpatuman sa Executive Order No. 005 series of 2021.

Sa eksklusibong pakighinabi sa Bombo Radyo Butuan, gipadayag ni Land Traffic, Transportation and Management Office kon LTTMO-Butuan officer-in-charge Peter Paul Manatad nga kini ang magtutok sa tricycle route plan aron malu-ag lu-agan una ang pagpatuman sa maong kamanduan sa ingon matugutang makapamasada ang maong mga sakyanan sa mga lugar nga dili apil sa ilang ruta.

-- Advertising --
Photo: CTTO

Kini aron lang dili mahasol ang pagpanakay sa mga tawo ilabina sa mga trabahante kinsa nabalda sa pila ka adlaw nang pag-ban sa mga orange tricycles pag-agi ug pagtabok sa highway.

Apan giklaro sa opisyal nga bisan ug gitugtan ang pagpabiyahe sa maong mga traysikol sa lugar nga wala’y apil sa ilang ruta, pabilin gihapon silang gidid-an pagsubay o kaha pagtabok man lang sa national highway.

Gidid-an usab sila pagtapok sa mga lugar nga gihimo nilang terminal taliwa nga wala kini girekognisa sa city government hinuon mahimo nila kining gamitong pick-up point.