BUTUAN CITY – Gikaguol sa mga fans sa sikat nga golfer nga si Tiger Woods ang iyang nadangatan human ang iyang pagka-aksidente kaganinang sayo sa buntag, oras sa Pilipinas samtang nagmaneho sa iyang sakyanan didto sa Los Angeles, California.

Sa eksklusibong pakighinabi sa Bombo Radyo Butuan kang Ferdinand Nakila direkta gikan sa California, gibutyag niining mibalik sa panumduman sa mga tawo sa Amerika ang nahitabo ning mi-aging tuig kang NBA star Kobe Bryant human usab nadisgrasya-patay samtang sakay sa iyang chopper uban ang iyang anak nga si Gianna.

-- Advertising --

Saysay ni Nakila, duna matud pa’y tambungang event ang golfer diin siya ang model rason nga paspas kining nagmaneho sa iyang sakyanan.

Nasayran pa ni Nakila nga accident-prone area ang na-aksidentihan ni Woods tungod kay gawas nga paliko, panaog usab kini ug base sa iyang inisyal nga nasayran, kusog ang pagpadagan niini sa iyang sakyanan rason sa pagsirko niini.

Gipasabot usab niining gi-label sa mga tawo nga seryuso ang nasinatiang multiple leg injuries ni Woods tungod kay golfer man kini ug dako ang posibilidad nga dili na siya makadula pa higayong ma-apektuhan ang iyang pagtindog.