BUTUAN CITY – Dili pa gihapon makatuo ang Surigaonon nga amateur boxer nga si Rich Diamond Baruman nga magbunga og maayo ang pito ka oras niyang paghulat sa higayong iyang makabagat nga personal ang iyang idolo nga si Pinoy Champ Manny Pacquiao dihang midalikyat ang fighting senator sa ilang lugar sa Surigao City.

Sigon sa 19-anyos nga si Baruman, naglingkod siya sa backseat sa usa ka sakyanang nakaparada sa gawas nga bahin sa Surigao City Hall uban sa gatusang mga Surigaonons nga naghulat nga makakita og tsansang mahimamat nga personal ang boksidor.

Si Baruman nagtrabaho isip janitor ug trainer sa usa ka local boxing gym sa Surigao City aron lang libre siyang makagamit sa mga training facilities sa ingon matuman ang iyang pangandoy nga mahimong usa ka professional boxer sa umalabot nga mga adlaw. 

Ang gusto lang unta niya nga bisan mahatagan lang siya og boxing gloves sa iyang idolo.

Video: CTTO

Atol sa news conference, mihangyo siya sa usa ka grupo sa mga reporters nga makutay siya sa senador rason nga gipa-ila ila siya ngadto kang Pacquiao samtang gibasa ang iyang amateur boxing record nga duna’y 11 ka daug sa 13 niya ka mga daug og duha ka pildi. 

-- ADVERTISEMENT --

Dinhi na mipahiyom si Pacman ug mihanyag kung gusto ba niining siya ang personal nga mu-train kaniya kansa iya gilayong gi-uyunan.

Tumang kalipay ang iyang gibati tungod kay nakita niyang inanay nang migimaw ang katumanan sa iyang mga damgo ilabina nga uban-uban na siya karon sa Team Pacquiao human gimanduan sa senador si Joey Hernal, ang head sa communications team sa Pacquiao, nga makig-alayon kaniya.