BUTUAN CITY – Nag-agad lang sa lakang nga himuon sa City Environment and Natural Resources Office kon City-ENRO ang konseho sa Brgy. Cabcabon kalabot sa natanggong nga aplikasyon sa permit to operate nga gipasa sa duha ka poultry farms nga anaa sa ilang barangay.
Kini ang reaksyon sa kapitan dihang gipa-abot sa mga residente dinhi sa sibyahan ang ilang reklamo tungod sa sobra kadaghan na sa mga langaw nga anaa sa sulod ug gawas sa illng panimalay nga dakong hulga sa panglawas tungod sa dili saktong pag-operate sa maong manukan.
Sa eksklusibong pakighinabi sa Bombo Radyo Butuan, gibutyag ni Kapitan Manuel Sison Jr. nga silang tanan sa ilang barangay ang nahasol sa taud-taud na nga panahon nga nagsugod dihang siya kagawad pa sa ilang barangay.
Karon pa nahitabo nga Pebrero na lang, wala pa gihapon nakakuha og permit ang manukan sa ilang barangay tungod sa kakulang sa mga papeles nga kinahanglan nilang i-comply.
Dawat ni Kapitan Sison ang mga sakit nga post ug pagsaway sa ilang mga residente tungod sa maong problema apan mipasalig kini nga mi-aksyon sila aron lang mawala na kini nga problema nga pareho nilang nasinatian.
Dawat usab nila ang kadako sa gasto sa mga poultry farms rason nga gihangyo nila nga imintina lang ang kahinlo sa ilang manukan aron mawala na ang giproblemang langaw sa ilang katawhan.
Samtang personal nga nasaksihan nila Cabncabon Kagawad Lorvi Guelos sa ilang gihimong final inspection niadtong Enero 6 ning tuiga sa usa ka manukan uban ang taga-City ENRO ang grabe kadaghan sa mga langaw ilabina nga duna pa’y nabilin nga kapin sa 2-mil ka mga manok nga wala pa mahalin tungod sa kakulang pa sa ilang timbang.
Sa eksklusibong pakighinabi ning sibyahan, gibutyag ni Kagawad Guelos nga ang nakadaghan og samot sa mga langaw mao ang basa nga iti sa mga manok.
Dinhi na matud pa gisultihan sa taga-City ENRO ang nagdumala sa manukan nga human og dispose sa nabilin nga mga manok, dili una sila magbuhi pag-usab hangtud nga dili masunod ang mga rekomendasyon sa City ENRO.
