BUTUAN CITY – Muhimo og pagpanubay ang konseho sa Brgy. Ampayon ning siyudad aron maresolba ang reklamo sa mga vendors ug stall owners sa Ampayon Public Market kalabot sa managlahing resulta sa ilang rapid test nga gihimo sa taga-City Health Office ug sa gidu-ulan nilang pribadong laboratoryo.

Kini ang gipasalig ni Kapitan Rudencio Basubas Jr. isip amahan sa barangay tungod sa kalibog nga mugna niini.

-- Advertising --

Sa eksklusibong pakighinabi sa Bombo Radyo Butuan, gipadayag ni Kapitan Basubas nga dakong tulabagon kini sa lokal nga kagamhanan ngadto sa mga hingtungdan ilabina nga gitugutan nila ang pag-operate sa mga pribadong laboratoryo.

Gawas pa kini sa kamatu-urang maka-apekto kini sa panginabuhian sa mga naninda ilabina kung 14 ka adlaw silang dili makapaninda. Nakadugang pa niini ang dugay rang gidiskurahe nga paggamit sa rapid tests tungod sa kawala’y klarong resulta niini.

Sa pagkakaron, dili pa makahimo og aksyon ang kapitan tungod kay wala pa’y mi-abot kaniyang ebidensya subay sa maong reklamo nga maoy basehan niya sa pagsang-at og aksyon ngadto unya sa City Health Office.