BUTUAN CITY – Ang kalisod og kawala na’y kalipay sa underground movement maoy nakapa-aghat sa usa ka rebeldeng New People’s Army kon NPA pagtahan na ngadto sa mga otoridad.

Sigon ni 2nd Lieutenant Ashley Mae Del Rosario, Civil Military Operations kon CMO officer sa 29th Infantry ‘Matatag’ Battallion sa 29th IB, mitahan si Rudy Alimbuyong, kinsa naila sa maong kalihukan sa bansag nga “Ka Bunso” sa Sandatahang Platoon Pangpropaganda kon SPP-16A, Guerilla-Front Committee 16 osa CPP-NPA Northeastern Mindanao Regional Committee, ngadto kang 29th IB Commmander Lt. Col. Glenn Joy Aynera.

Nasayran nga 13 ka buwang mi-uban sa rebolusyunaryong kalihukan si “Ka Bunso” kinsa nag-operate sa mga lungsod sa Santiago, Jabonga og Kitcharao, pulos sakop sa Agusan del Norte og nalambigit sa mga engkwentro sa Barangay Hinimbangan, lungsod sa Kitcharao sa Agusan del Norte.

Sigon ni Col. Aynera, nakadesisyon pagtahan si Rudy human nakita ang mga kanhi niya ka-ubanan nga na-usab na ang kinabuhi. Kampante siyang mao usab kini ang iyang madangatan uban sa pagpuyong malinawon og normal ang kinabuhi. (Beth Ruiz)