BUTUAN CITY- Hugot ang pahimangno karon sa kadumalahan sa Police Regional Office kon PRO 13 ngadto sa ilang mga ginsakpan nga dili mo-engage sa bisan unsang mga kriminal nga buhatan aron dili mapapha sa ilang trabaho ug manubag sa balaod.

Kini subay na sa natigayon nga pagmusil-patay sa usa ka police corporal (PCpl) nga nailang si PCpl Billy Joe Tindugan, ngadto sa usa tricycle driver nga si Dariel Torregoza sa Tandag City, Surigao del Sur, ning mi-aging kaadlawon.

-- Advertising --

Sigon ni PMaj Dorothy Tumulak ang tigpamaba sa PRO13 sa pakighinabi ning sibyahan nga pinaagi sa hugot nga mandato ni Police Regional Office (PRO)13 Director BGeneral Romeo Caramt Jr., dili nila i-tolerate ang bisan unsang sayop nga binuhatan sa ilang mga ginasakapang kapulisan.

Gipasalig ni PMaj Tumulak nga walay mahimong pagtabon sa kaso ug mahimong patas sila sa imbestigasyon.

Gani gipaniguro nga mapanubag gayod ang pulis nga mihimo sa krimen sa ingon nga mahatagan og hustisya ang mga kabanay sa biktima.

Nag-atubang na og kasong pagpatay ang maong police corporal (PCpl) kinsa residente sa Brgy. Buenavista, Tandag City ug na-asssign sa PRO-13 headquarters nga karon gikostudiya sa Tandag City Police Station.

Gimando na usab ang paglusad og pre-charge investigation batuk sa maong pulis alang sa ipasaka usab nga kasong administratibo.

Base sa imbestigasyon, nakig-inom ang pulis ngadto sa biktima apan pag-abot sa ala-1:35 ning mi-aging kaadlawon, nagkalalis ang duruha.

Dinhi na gipusil sa pulis ang biktima diha sa iyang lawas apil na sa iyang tangkugo gamit ang 9mm pistol.