BUTUAN CITY – Pipila ka mga residente sa Purok 3, Brgy. Doongan ning siyudad ang nagyangungo human matud pa gibaharang pahawaon sa yutang gitarukan sa ilang balay tungod sa nagpa-ilang nanag-iya matud pa sa luna nga si Edwina Ybañez kansa sa ilang nasayran, napalit na ni kanhi city councilor Engr. Sergio ‘Serge’ Pascual.

Sa eksklusibong pakighinabi sa Bombo Radyo Butuan, gipadayag sa residenteng si Wendelyn Burdeos, 48-anyos na siya ug nagpuyo siya sa maong lugar sukad sa iyang adlaw’ng natawhan.

Nakamatngon matud pa siya og bu-ot ug nasayod nga si Engr. Pascual ang tag-iya niini rason nga dako na lang ang ilang kakurat dihang gipatawag sila sa barangay ni Atty. Ronel Azarcon nga maoy nagpahibalo kanila nga kinahanglan na nilang biyaan ang lugar kay gamiton na matud pa sa tag-iya bugti sa bayad nga 20-mil pesos kada-bubong.

Wala matud pa sila magpadala sa bahad ni Azarcon kinsa iya pang gibinlan og good luck wish sa iyang pagdagan karong May 2022 elections isip kongresista ning siyudad ug unang distrito sa Agusan del Norte.

Samtang gipadayag usab sa 60-anyos nga si Myrna Curalde, nga base sa iyang nasayran, ang iyang father-in-law ang nagsa-op sa yuta nga gilukat ni Engr. Pascual ngadto sa bangko human matud pa giprenda sa pamilya Guillen.

-- ADVERTISEMENT --

Samtang gipadayag usab sa laing residente nga nga si Edgardo Banton nga unta atubangon sa nagpa-ilang bag-ong tag-iya sa yuta nga si Edwina Ybañez ang husay sa korte tali nila Engr. Pascual aron mugawas ang kamatu-uran.

Duna matud pa’y ilang silingang midawat na sa 20-mil pesos rason nga mihawa na apan sila, maghuwat kung unsa ang mahimong desisyon ni Engr. Pascual sa kasamtangang sitwasyon.