BUTUAN CITY – Gitaho sa Chinese media ang kaso sa duha ka mga doktor nga na-infect sa novel coronavirus samtang nagtambal sa ilang mga pasyente ug nakasinati og paspas nga ka-usaban sa ilang kolor sa panit kon skin pigmentation, gikan sa pagkaputi ngadto na sa dark brown.

Sila Dr. Yi Fan ug Dr. Hu Weifeng, parehong 42-anyos, nataptan sa coronavirus niadtong Enero, samtang nagtambal sa mga pasyente sa Wuhan Central Hospital.

-- Advertising --

Ka-ubanan sila ni Dr. Li Wenliang, ang namatay’ng whistle-blower nga unang nag-alarma kalabot sa delikadong bag-ong virus ug orihinal nga gi-reprimand sa Chinese Government.

Pareho nilang gipa-ambit ang ilang kasinatian kondiin ilang gibutyag nga  ang maisugong paningkamot sa ilang mga ka-ubanang doktor ang  hinungdan sa ilang pagkabuhi pa karon.

Nasayrang parehong kapin sa  usa ka buwan silang migamit og life-support ug ning bulana lang nabalikan sa ilang panimuot rason nga ning bulana  ang usab sila nasayod kalabot sa kalit nga pagka-usab sa ilang pamayhon.  

Parehong na-shock ang tanang mga tawong nakakita sa una nilang hulagway ug karong na-usab na ang ilang kolor dihang nag-guest sila sa Beijing Satellite TV.

Sigon sa ilang mga ka-ubanang tungod kini sa tambal nga gigamit kan ila sa sayong bahin sa pagtambal kanila kondiin usa matud pa sa mga side effects sa wala panganling tambal mao ang pag-usab sa kolor sa ilang panit.  

Nasayrang nakalingkawas gikan sa COVID-19 si Dr Yi, usa ka Wuhan cardiologist, human siya gipagamit og life support machine nga ECMO sulod sa 39 ka mga adlaw.

Kini nga advanced system maoy mihulip sa function sa kasing-kasing ug baga pinaagi sa pagbomba og oxygen ngadto sa dugo.

Aminado siyang maayo ang iyang recovery apan dili pa makalakaw nga siya lang dungan sa pagbutyag nga nakasinati usab siya og mental trauma tungod sa maong sakit ug kanunay pang urumon.

Apan mas seryuso ang kondisyon ni Dr. Hu tungod kay dihang gikuhaan siya og video, dili pa siya makasulti apan iya pang napislit ang bukton sa doctor nga nag-atiman kaniya timaan sa iyang pagpasalamat. Si Dr. Hu usa ka urologist, kinsa 99 ka adlaw’ng naglubog sa katre hinungdan nga nabalaka ang iyang mga doktor sa iyang mental state.