BUTUAN CITY – Mipasalig ang mga personahe sa Butuan City Social Welfare and Development kon CSWD nga apil sa mahatagan sa ilang bahin sa mga programa sa ahensya ang pamilya sa biyudang si Ludivina Villamor sa Brgy. Mahogany ning siyudad.

 

-- Advertising --

Kini human ang gihimo nilang assessment sa estado sa kinabuhi sa maong pamilya kinsa nag-viral human gi-post sa social media ang ilang pinuy-anang wala’y atop og nasuta pa sa interview sa Bombo Radyo Butuan nga magpayong lang sila higayong mag-ulan ilabina panahon sa kagabhi-on.

 

Migawas ang maong pasalig ilabina dihang nasuta nga miyembro sa Pantawid Pamilyang Pilipino Program kon 4Ps sa kagamhanan ang maong pamilya.

 

Sa eksklusibong pakighinabi ning sibyahan, giklaro ni Butuan City Councilor Ferdinand Nalcot nga sa mismong adlaw pa lang nga gi-post ang hulagway sa ilang pinuy-anan nga gipa-ayo na sa magtutudlong si Carlos Ednilan, gidalikyatan gilayon kini sa taga-CSWD.

 

Nasayrang plano usab sa magtutudlo nga pabuhatan og kaugalingong pansayan ang mga Villamor human nasuta nga wala usab sila niini.

 

Gidugang pa sa konsehal nga makatandog sa kasing-kasing ang mensaheng dala sa maong post tungod kay nagpaluyo niini ang mapa-ubsanong pagtabang sa usa ka magtutudlo aron lang mahatagan og komportableng kapuy-an ang iyang estudyante nga anak ni Ludivina.

 

Dili matud pa matupngan ang gihimo sa magtutudlo tungod sa iyang kapursigidong dili magpa-ila taliwa nga dakong tabang na ang iyang pagpa-atop og pagpabungbong sa balay sa iyang magtutungha kinsa dili maka-eskwela higayong mag-ulan tungod kay mabasa man ang tanan nilang mga sapot. (Beth Ruiz)