BUTUAN CITY – Gipangunahan mismo ni Butuan City Vice Mayor Jose ‘Joeboy’ Aquino II ang mga senior citizens ning siyudad, pagpatupok og COVID-19 vaccines kaganina sa may FSUU Morelos gym sa Brgy. Libertad ning siyudad.

Sa eksklusibong pakighinabi sa Bombo Radyo Butuan, gipadayag sa opisyal nga tungod kay gihinusgan sa gobyerno ang vaccination roll out, nagpasabot lamang nga maka-ayo kini sa tanan rason nga wala matud pa’y angayang kabalak-an ilabina sa mga gikatahong adverse effects niini.

-- Advertising --

Tungod niini, nanawagan siya sa tanan nga kung ila nang torno sa pagpabakuna, dili na magduha-duha pagpatupok tungod kay limitado lang ang supply ug angayan matud pang timan-an nga tumong sa bakuna nga dili makasinati og severe symptoms ang mga mataptan sa makamatay nga coronavirus ilabina ang mga senior citizens.

Angayan matud pang timan-an sa tanan nga ang pagpabakuna dili lang alang sa kaayuhan sa nagpatupok kondili apil na sa ilang pamilya. Nagpahinumdom usab ang besi-mayor nga bisan og natupukan na og COVID-19 vaccine, kinahanglan gihapong obserbahon ang health protocols aron masigurong dili na madugangan pa ang mga kaso niini.

Dako ang iyang kalipay nga daghang mga senior citizens ang mi-avail sa maong libreng bakuna dayong pasalamat sa tanang mga healthcare frontliners nga sukad sa pagsugod sa pandemya hangtud karon, padayong nagserbisyo sa katawhan.

Nasayrang tungod sa gitumar nga tambal, gipabalik ning hapuna ang besi-mayor alang na sa vaccine jab.

Samtang aminado ang 77-anyos nga si Clarita Arco nga taga-Casa Rivera nga medyo gikulbaan siya sa screening pa lang apan ang iyang kadeterminado nga mabakunahan alang sa kaluwasan usab sa iyang pamilya ang naghatag kaniya og ka-isog nga labangan ang iyang gamay’ng kahadlok.