BUTUAN CITY – Duna gihapo’y panagtapok nga himuon sa New York atol sa paghandom sa ika-19 nga anibersaryo sa 9-11 terror attack bisan pa man sa nagtunhay nga COVID-19 pandemic.

Kini ang gikumpirma ni Renierose Deligencia-Gikling, lumad nga taga-Brgy. Tagbungabong, RTR, Agusan del Norte ug unom ka tuig nang nagpuyo sa New York human naminyo.

-- Advertising --

Sa eksklusibong pakighinabi sa Bombo Radyo Butuan, gipadayag ni Gikling nga aduna na’y ka-usaban ang kalihukang himuon unyang gabii – oras sa Pilipinas didto sa New York partikular sa gipatumang health measures tungod sa coronavirus.

Ang kaniadto, live nga pagbasa sa pangalan sa tanang namatay sa ngilngig nga pag-atake sa Al Qaeda ngadto sa Twin Tower sa World Trade Center, karon recorded na lang aron malikayan ang pagkaylap sa COVID-19.

Duna usa’y patambungon apan kini limitado lang. Duna usab matud pa’y ubang mga estado nga maghandom sa maong panghitabo apan kini didto lang sa mga wala na magpatuman og lockdown apan sa gihapon, limitado usab ang ilang himuong programa.