BUTUAN CITY – Gitambungan sa mga dagkong opisyal sa New York, USA ang paghandom sa mga nahimong biktima sa 9/11 terror attack niadtong Septembre 11, 2001 pagpanguna ni President Joe Biden uban ni kanhi US President Barrack Obama ug sa presidente sa panahon sa maong ngilngig nga panghitabo nga si George Bush.

Sa eksklusibong pakighinabi sa Bombo Radyo Butuan, gipadayag ni Ian Plaza direkta gikan sa New York, nga sa maong kalihukan, usa-usang gitawag ang pangalan sa mga biktima sa 9/11 attack isip paghandom kanila.

Gani atol sa selebrasyon, dunay duha ka beam lights ang gipasiga isip simbolo sa 2 ka tower nga gi-atake niadtong panahona kondiin gitawag ang maong tower og ‘One World’.

Gibutyag usab ni Plaza nga sa kasamtangan, gihimo na nga museum ang building nga gitukod sa lokasyon diin nahagsa ang eroplano kondiin makita sulod usab sa maong dakbalay ang mga gamit sa mga biktima sa pagkahagsa sa eroplano.

Gani sa maong area sa gibarugan sa duha ka tower dunay gihimong pool diin didto gibutang ang nasangpit nga mga gamit, uban sa mga gilapida nilang pangalan isip handumanan ugaling mubisita dinhi ang mga pamilya sa mga biktima.

-- Advertisement --

Sumala pa ni Plaza, atol sa paghandom sa 9/11 terror attack sa nasangpit nga nasud, hugot nga seguridad ang gipatuman sa palibot.

Gani ang maong selebrasyon sukwahi sa mi-aging mga paghandom tungod kay karun mismong mga pamilya lang sa mga biktima ang lakip sa mga mitambong sa mitaliwan nilang mga kabanay.