BUTUAN CITY – Nagpaabot ug mensahe ngadto sa Malacañang ang usa 3rd Year College Student aron ipaabot ang pagtabang sa usa ka policewoman ngadto kaniya sa dihang kini siya na-disgrasya diha sa dalan.

-- Advertising --

Nasayran nga niadtong martes sa alas 3:30 sa hapon nahitabo ang insidente diin nadumbulan ang single motor nga gimanehoan ni Kevin Wang atbang sa dakong mall ning siyudad hinungdan sa iyang pagkalagpot.

Walay pagduha-duha usab nga gitabangan siya ni Police Master Sergeant Rhea Acas, gikan sa Butuan City Police Station-3 diin ang pulis pa ang nagdala kaniya sa ospital.

Hilabihan ang pasalamat ni Wang ilabina kay wala siya biyae sa pulis  hangtud nga kini na-atiman sa mga doctor og miabot ang iyang pamilya.

Tungod niini, nagtunol og sulat pagpasalamat si Wang ngadto sa kapulisan samtang gipaabot na usab kini ngadto sa Malacañang.

Sa eksklusibong pakighinabi ning sibyahan kang Police Capt. Emmerson Alipit, Hepe sa Butuan City Police Station-3, gipahayag niining hilabihan siya ka proud sa gibuhat ni Police Master Sergeant Acas nga mipakita og kinasing-kasing nga pagtabang sa nagkinahanglan.

Kini dungan sa pagbutyag nga dili lang pulis ang angay nga mupakita sa maayong buhat kundi ang tanang katawhan.