BUTUAN CITY- Naghimo karon og blocking operation ang mga otoridad sa mga lugar nga posibleng sibatan sa mga rebeldeng New People’s Army kon NPA human ang gihimong pagbomba sa 65th infantry brigade Philippine Army sa kuta sa maong mga rebelde sa hilit nga bahin sa Barangay Los Angeles ning siyudad.

Sa taho ni Butuan City Police Office information officer PMaj Emerson Alipit, gipadayag niining nahitabo ang insidente pasado ala-1:45 sa hapon niadtong Nobyembre 3 isip kabahin sa Intensified Military Operation (IMO) batok sa CPP NPA NDF.

Gikataho nga duha ka AW109 Agusta helicopters ang nagbuhi og pito ka high explosive (HE) rockets, usa ka white phosphorus (WP) rocket ug nagpa-ulan sa 400 rounds, .50 caliber sa nasangpit nga hideout.


Dali matud pang nangikyas ug gi-abandona sa mga sakop sa communist terrorist group (CTG) ang maong kuta rasong gilusad na usab ang blocking operation samtang nagpadayon ang clearing operation sa maong lugar.

-- ADVERTISEMENT --

Alayon niini gikatahong tungod sa kalisang sa maong operasyong militar, namatay ang usa ka mag-uuma nga napalgang nag-utaw-utaw sa dam sa Brgy. Balang-Balang lungsod sa RTR, Agusan del Norte kansa duol ra usab sa dapit nga nahitabuan.

Naila biktima nga si Remy Darasin, 48-anyos, minyo ug residente sa Purok 8, Brgy. Balang-Balang.

Sumala sa asawa niining si Imelda, mibiya ang iyang bana sa buntag pa lang adiser ang binombahay aron unta manglampas sa ilang luna sa ingon nga matamnan og falcata.

Wala na kini makauli sa ilang panimalay hantod nga napalgan na lang kining nag-utaw-utaw sa dam nga wala nay kinabuhi.

Duda sa mga kabanay sa biktima nga nipugos kini og tabok sa maong suba tungod sa kalisang sa dagkong buto sa gihimong airstrike sa mga helicopter nga iya sa gobyerno.