BUTUAN CITY – Gatusang mga eksplosibo ug mga buhing bala nga gipanag-iyahan sa mga rebeldeng New People’s Army kon NPA ang narekober sa mga personahe sa Agusan del Sur Police Provincial Office kagahapon sa kabukiran sa   Km. 18, Barangay Segunda, Esperanza, Agusan del Sur. 

Sigon ni Lt. Col. Darwin Yu,  officer-in-charge sa Provincial Community Affairs and Development Unit sa maong buhatan, ang pagkarekober sa maong gamit panggiyera, resulta sa intelligence work ug sa suporta sa mga residente sa maong lugar. 

Dihang natumbok na sa kapulisan ang tukmang lokasyon sa maong mga war materials, daling gilusad ang operasyon pagpanguna ni Agusan Del Sur-PPO Director Col. Ruben Delos Santos uban sa mga sakop sa First ug Second Mobile Force apil na sa Intelligence Unit sa kapulisan sa maong lalawigan. 

Apil sa mga narekober ang 111 ka mga Nitro EM 1000g Metro Explosive Emulsion Dynamites, duha ka mga anti-personnel mines, usa ka 80-metros nga firing wire, 9 ka mga blasting caps, 484 ka 5.56 nga buhing bala alang sa M16 rifle, 15 ka mga 7.62 live ammunition alang sa AK-47 rifle, ug usa ka Garand rifle. 

Narekober usab sa tropa sa gobyerno ang nagkada-iyang medical supplies, mga libro ug bandila sa NPA. 

-- ADVERTISEMENT --