BUTUAN CITY – Giklaro sa Department of Health kon DOH-Caraga nga mupa-ilalom pa gihapon sa 14 ka adlaw nga quarantine ang mga returning overseas Filipinos kon ROFs nga mu-uli ning rehiyon kung sila gikan sa mga nasud nga duna’y kaso sa bag-ong variant sa COVID-19 bisan pa man ug mipa-ilalom na sila sa 14 ka adlaw nga quarantine sa mga quarantine facilities pag-abot nila sa kauluhan.

Sa eksklusibong pakighinabi sa Bombo Radyo Butuan, gipadayag ni Dr. Gerna Manatad, assistant regional director sa DOH-Caraga, ang ilang gipagawas nga advisory, nakabase ra usab sa palisiya o guidelines gikan sa National Inter-Agency Task, nga angayan nilang sundon aron malikayan ang pagkaylap sa COVID-19 ilabina sa nakasulod na sa nasud nga bag-ong SARS-COV2 variant.

-- Advertising --
Photo: CTTO

Angayan matud pang sabton sa katawhan ang sitwasyon karon ingon man ang pag-monitor sa COVID -19 ilabina sa bag-ong variant niini.

Gipasabot ni Dr. Manatad nga ang bag-ong variant paspas nga mukaylap rason nga bisan ug naka-quarantine na ang ROF ug magnegatibo sa pinaka-ulahi niyang RT-PCR test human sa quarantine period, ipa-ilalom gihapon sila sa 14 ka adlaw nga kwarantinas sa bisan asang dapit ning rehiyon diin sila nagpuyo.

Kini bisan pa man og gikan nila paggawas sa quarantine facility sa kauluhan, magdala sila og pribadong sakyanan nga maoy magdala sa kanila sa ilang pagpa-uli.

Tumong matud pa niini nga ma-trace ug ma-obserbahan ang tanan nilang mga naka-close contacts.