BUTUAN CITY – Gihikay na sa mga personahe sa 401st Brigade, Philippine Army ang gikinahanglang mga papeles sa mga kanhi amasona kon mga kanhi babayeng rebeldeng NPA.

Kini aron mahitsas na ang ilang mga papeles sama sa passport nga gamiton sa ilang pagsuroy sa Hong Kong nga maoy gisaad ni Pangulong Rodrigo Duterte.

Gibutyag ni Capt. Cordero nga human og suroy sa maong mga kanhi amasona, ila na usab nga hikayon ang gusto sa maong mga surrenderees nga ilang sudlang panginabuhian.

Duna matud pa’y uban nga mupa-ilalom sa libreng training sa Technical Education, Skills and Development Authority kon TESDA, samtang ang uban gustong magpakabuhing yano basta suportahan lang sa gobyerno og duna’y uban sama sa kadaghanang mga lalaki, nga gustong magsundalo o kaha CAFGU.

-- ADVERTISEMENT --

Isip bugti sa maayong pagdawat sa administrasyong Duterte sa ilang pagsurender, gibutyag ni Capt. Cordero nga misaad ang maong mga kanhi rebelde nga siento-porsientong suportahan ang mga programa sa gobyerno dungan sa pag-awhag sa ilang mga ka-ubanang anaa pa sa pakigbisog nga mutahan na sa gobyerno. (Beth Ruiz)