BUTUAN CITY – Sentro sa katapusang State of the City Address kon SOCA ni Butuan City Mayor Ronnie Vicente Lagnada kagabii ang mga kalampusan ug mga hagit nga nasinatian ning siyudad ilabina sa COVID-19 pandemic ug gi-unsa kini paghupot ug pagresponde.

Gi-atol ang city address sa ika-71 nga aniberasryo sa kamugnaan ning siyudad kondiin sa adlawan pa lang, gihimo ang wreath-laying sa lubnganan sa amahan ning siyudad nga si anhing Congressman Marcos Calo ug virtual nga gipakita sa publiko.

-- Advertising --
Photo: CTTO

Sa entrada sa iyang pagpamulong, gpasabot ni Mayor Lagnada nga kini na ang ikaduhang tuig sa iyang SOCA nga dili face-to-face ang nahitabo tungod sa padayong hulga sa COVID-19 ilabina sa mas gikahadlukang Delta variant kansa mao usa’y rason nga nahunong ang tanan nga mga na-andang buluhaton.

Dinhi na dayon gipresenta sa mayor ang mga estratihikong inisyatiba nga gihimo sa lokal nga kagamhanan ug mga himu-unon pa hangtud nga makab-ot na ang target nga plano alang sa kalambuan ning siyudad.

Gibutyag ni Mayor Lagnada nga sa pag-igo pa lang sa COVID-19 sa tibuok kalibutan ug ning siyudad sa unang kwarter ning mi-aging tuig 2020, giprayuridad gilayon sa iyang kagamhanan ang pagbaton ug saktong plano ug pagtutok sa mga aspeto sa prevention, early detection, saktong treatment ug pagkab-ot sa immunity.