BUTUAN CITY – Kampante ang mga orange tricycle drivers ug operators dinhi sa siyudad nga dunggon sa lokal nga kagamhanan ang ilang demand sa gipahigayong silent protests kagahapon isip pagsupak sa Executive Order NO. 005-2021 nga gipagawas ni Mayor Ronnie Vicente Lagnada.

May kalabutan kini sa dili na pagpa-agi o kaha pagtabok na sa mga kolor orange nga traysikol sa mga national highways ning siyudad apil na sa mga tuklay sama sa Magsaysay.

-- Advertising --

Sa eksklusibong pakighinabi sa Bombo Radyo Butuan, gipadayag ni Jun Ybañez, presidente sa Butuan City Transport Federation, nga nataud-tauran ang ilang panagtapok sa may Guingona Park tungod sa last-minute change sa lokasyon sa protesta aron dili sila ma[igo sa mga technical issues.

Gipasabot ni Ybañez nga wala sila’y gihan-ay nga programa tungod kay silent protest man ang ilang gihimo rason nga ang ilang mga yangungo, gisulat lang nila sa mga plackards aron paminawon sa city government.

Samtang gipadayag usab sa usa ka tricycle driver nga dili lang sila ang nagproblema karon sa gipatumang kamanduan sa mayor tungod kay apil ang mga pasahero mahasol usab niini ilabina kadtong nagpuyo sa mga lagyong barangay sama sa San Vicente.

Aminado ang maong driver nga makadismaya ang kalit-kalit nga desisyon sa mayor nga wala man lang maghan-ay og plano aron maplastar ang ilang pagpamasada ug nanghinaut usab kini nga unta paminawon ni Pangulong Rodrigo Duterte ang ilang mga sentimiento.

Wala’y lipod-lipod nga gipadayag eksklusibo sa Bombo radyo Butuan lamang, ang yangungo ug kadismaya sa mga tricycle drivers sa pag-ban na kanila pagsubay o kaha pagtabok sa national highway.

Usa kanila ang ma-isugong nagbutyag nga unta gihuna-huna nang daan sa city government ang dangatan nilang mga drivers sa orange tricycle sa pagpatuman sa maong kamanduan, ilabina ang mahimong epekto niini sa ilang panginabuhian.

Unta gihuna-huna matud pa sa city government ilabina sa mayor nga isusama ang ilang sitwasyon sa mga informal settlers nga adiser pa i-demolish ang mga pinuy-anan, duna na’y gihan-ay nga relocation area aron ilang kapuy-an.

Dili matud pa sila lisod pasabton ilabina nga dili sila supak sa mga kalampusan ug pagpalambo sa Butuan apan unta, gihuna-huna daan sa city government kung asa sila mukuha og pangitaan nga apektado man sila sa maong ban.

Dili matud pa sila mahadlok nga makig-atubang ni bisan kinsang opisyal, aron lang mapaminaw ang ilang tinguha nga ibasura una ang kamanduan sa mayor.